Ажәеиҧшь ашәарыцара данҭыҵуа

(ацыҧҵәаха)

​

    Ажәытәан зны, Гиенос аҿиара ашьақәгылараан, ашәарыцаратә ҟазараҿгьы абџьар аҽанарҿыцуаз аамҭазы, Шәакәаз агәҭынчымра иманы абна даалҵит:

– Иаҳхылаҧшхәу, атәымуаа рахьтә аӡәы ҳабна дылоуп. Уцәа иалсны убаҩ аҟынӡа инеины уҧызыххаауа иҳәҳәабжь ала, уи аҧстәқәа дрылагьежьуа дрылоуп. Аҧсаатә ҧырны ицоит, агыгшәыгқәагьы абна аанрыжьуеит.

– Дубама иара? – Дҵааит Ажәеиҧшь.

– Мап, иҳәҳәабжь иааигәа снанамышьҭӡеит.

​

    Ахәылбыҽха, амра аҭашәамҭаз Ажәеиҧш иҧҳа аиҵыбы дааит:

– Саб. Иаҳзымдыруа аҧстәы аҵларкәыкә иеиҧшуп, аха еиҳарак аты ацәа ахукаауеит. Уи аныҧыруа абжьы уаҳаӡом, ахаҭагьы убаӡом. Амахә иқәтәаны ҳәҳәабжьла ианыҿнаҭуа ауп Амза аасҭа илашаӡа ианубо.

– Ашәарыцацәа ббама абнаҿы?

– Урҭ шәаны ашәарыцара иҭыҵӡом. Дызҳазгәааи ҳәа еизҵаауеит, уӡбахә рымоуп.

​

    Адырҩаҽныгьы иҟалац ҟалеит.

​

   Абас имҩасит ҩымш. Нас хымш. Аҧшьымш рыҽны, атәым ҧсаатә ашҳам злаз абжьы Ажәеиҧшь дахьынхоз ахәы аҟынӡа инаӡеит. Амра шәахәақәа аҵлақәа рықәцәқәа ианырхьыс (есыҳьыжь аныҳәара анымҩаҧигоз аамҭазы), Ажәеиҧшь иқьала ддәылымҵит. Имаҵуҩы гәрага Шәакәаз иеиликааит, аҧстәқәа рхылаҧшхәы, ашәарыцаҩ ишиҟазшьоу еиҧш, ашамҭанӡа дшыҵыҵыз.

​

    Ажәеиҧшь ишьҭақәа аанмыжькәа дцон, дагьцаӡомызт. Ажәеиҧшь ашьац аӡаӡа ықәрышәшәо днеиуан дыӡсо, дагьыӡсомызт. Соуиҧсара аҳәаа аҟынӡа данынаӡа, ахәҵара дышныҵалазҵәҟьа дҧырҧалыкьхан, зыбжьы цәгьаз атәым ишҟа ихы рханы аӷдара днылалеит.

​

    Ари ибеит ашәарыцаҩ Ҳаҭажәыҟәа. Уи Аӡҩыбжьара аҩхаа дҭысны иқыҭахь даауан.

​

    Ажәеиҧшьаа, ахаҳә ду ахьышьҭоу аӡиас ахагьежьырҭа аҟынӡа даннеи, амҵәыжәҩа змоу аҧстәы иахьӡаны изкуа ашәарах аҧшра ааихәеит.

​

    Атәым, аӡ еиҧш дышьҭыҧо, ишьҭыҧараан аҵлақәа рықәцәқәа алашара рықәрыҷҷо, ухшыҩ уахызхуа бжьы цәгьак иманы даацәырҵуан, нас дныҵаба дцон.

​

    Абас ала, идырым атәым ҧсаатәк Ажәеиҧшь инхара иҭанагалеит, ишәарахгьы ргәы ҭҟьаны ибна илнацо илнацон.

​

полный текст читать  здесь

​

​

​